data="http://portsaidhistory.com/themes/Magedfci/xspf_player_slim.swf?playlist_url=http://portsaidhistory.com/themes/Magedfci/test.xspf&autoplay=1&autoresume=1">

أحدث الصور

في مبنى القبة ببورسعيد أثناء توجه الزعماء الثلاثة جمال عبد الناصر وخرشوف رئيس الإتحاد السوفيتي وعبد السلام عارف رئيس العراق لركو

أحدث الفيديوهات

موقع تاريخ بورسعيد


20090613215030_0007.jpg

في تلك الليلة ومع الثواني الأخيرة من غروب شمس ذلك اليوم كانت شمس ذكريات سيادة العميد يسري عمارة تستعد للشروق لتطل علينا وتلقي بالمزيد من الأضواء على خبايا شخصيته الفريدة ، وحينما سطع نور الذكريات أضاء لقاءنا به بعد أن تكرم كعادته ولم يبخل على موقع تاريخ بورسعيد بإستقبالنا مرة أخرى ليجيب في هذه المرة على أسئلة قراء الموقع ، والتي إنهالت علينا فور نشر اللقاء الأول والذي تحدث لنا فيه عن قصة أسر عساف ياجوري ذلك القائد الإسرائيلي للواء 190 مدرع إبان حرب أكتوبر 1973 ، بعد أن أباد سيادة العميد ورفاقه هذا اللواء المدرع بالكامل في صفعة مصرية قوية لهذا العدو المتغطرس ..

 


 

 

وفي تلك الليلة السعيدة ، فتح لنا سيادته قلبه وعقله لتنساب الذكريات كما ينساب نهر النيل ببساطته وتفيض علينا بالعزة والكرامة ، ونعيش مع كل حرف ينطقه بأسلوبه البسيط في وسط هذه الأحداث ونتمنى لو كنا عشناها معه ، ونتمنى لو كنا حاربنا إلى جواره ، بل ونجدنا نسرح معه في هذه الأيام المجيدة ونتخيل أننا لو ملكنا السلاح في هذه اللحظة لنطلق منه على هذا العدو رصاصات الكرامة ولكن لانلبس أن نفيق أننا في الحاضر وأن هذا في الماضي البعيد ، فهذا الرجل مثل اعلى لكل الشباب والرجال يحتذى به .. كم أنت عظيمة يا مصر برجالك ..

لقد بلغت سعادة هذا الرجل مداها عندما علم بأن الشباب من قراء الموقع هو من يوجه له الأسئلة ، لقد كانت فرحته عارمة لما وجده من تفاعل الشباب من قراء الموقع مع اللقاء الأول والذي سرد فيه قصة أسر عساف ياجوري كاملة في سابقة لموقع تاريخ بورسعيد لم يسبقه لها أي موقع إلكتروني آخر ، وقد إتطلع سيادته على هذا اللقاء وأبدى إعجابه بتفاعل الشباب مع بطولات الآباء ..

وفي السطور التالية يجيب سيادته بكل حب على أسئلتكم ..

 

 

 

وإليكم الحوار ...

 


 

 

1.     كيف دخلت الكلية الجوية وهل كانت هي طموحاتك في ذلك الوقت ؟ 

  - الحقيقة أنا دخلت الكلية الجوية بالصدفة .. لأن كان أملي إني أكون مهندس زراعي .. إحنا فلاحين والمهندس الزراعي له قيمة كبيرة أوي في البلد .. كان أملي .. حتى كنت بكتب على الكتب بكالوريوس زراعة كده وأنا في الثانوية العامة .. إما خدت الثانوية العامة ، المجموع كان قليل .. جالي معهد تربية رياضية .. فالكلية الجوية فتحت باب القبول .. فقدمت أنا وزمايلي بالصدفة .. فربنا كرمني أيامها كنا حاجة وأربعين ألف أيامها سنة 66 .. فربنا كرمني والكشف الطبي تجاوزته ، والكلية الجوية مفيهاش واسطة .. الكلية الجوية بالذات مفيهاش واسطة .. لأن هي والمستوى الطبي .. يعني ربنا كرم بالمستوى الطبي هم بيجروا وراه علشان يخدوه .. إحنا كانت الكلية دفعتي كانت الدفعة 21 جوية .. دخلنا 145 طالب .. 26/11/66    

2.     كيف كان شعورك عندما أخرجك الطبيب منها ونقلك للكلية الحربية ؟ 

  - هو الحقيقة لما الدكتور قال لي يومها .. أنا فوجئت قلت له يا دكتور إحنا سامعيين إن فيه .. الجزائر باعته ضباط صف وناس عواجيز .. خلليني أكمل مين هيطير بعد سن الأربعين ؟؟ أنا أخش .. أنا أعمل .. بعد النكسة الكلام ده .. يعني كان بعد النكسة .. وبكيت كتير أوي .. إنما طبعا النظام العسكري مفيش فيه إستثناء . 

3.     حضرتك في شهادتك قلت أنكم كنتم شباب في العشرينات ، 22 سنة 23 سنة بنسمع الإذاعة إن فيه جبهة والصمود قلنا نروح نشوف الجبهة .. هل كانت الإذاعة في هذه الفترة مؤثرة إلى هذه الدرجة ؟ 

 

  - آه .. بس ما كنتش بتقول الحقيقة أوي .. يعني إحنا بنسمع جبهة الصمود .. وقواتنا المسلحة .. وبيعملوا إيه وبيسوا إيه .. إنما ما كانش فيه الحقيقة كاملة .. يعني أنا رحت أشوف الجبهة .. قلت بقى ده هتلاقى حاجة محصنة ، دشم محصنة كلام من ده كان .. رحت لقيت مفيش .. خندق اللي هو كان بيتردم .. كان طول النهار نطهر علشان نقف فيه خدمة طول الليل .. 24 ساعة .

 

 

 20090613215030_0002

 

4.     هل كان العدو الإسرائيلي يعبر للضفة الغربية أيام حرب الإستنزاف وما بعدها أم إكتفت إسرائيل ببلوغها الضفة الشرقية لقناة السويس ولم تحاول العبور للغرب للقيام بعمليات عسكرية ضد قواتنا المتمركزة في غرب القناة ؟ 

  - لا معبرش .. مايجرؤش .. هم جبناء .. ولا مرة ميجرؤش .. وبعدين إحنا كنا الضفة الغربية فاتحين من بورسعيد للسويس .. مفيش حد .. لا يجرؤ .. وبعدين صعبة .. وبعدين دي كمان صعبه إنه يعدي قناة السويس دي صعبه .. ده هو عشان يعمل ثغرة في الدفرسوار ، قفل القناة بدبش . 

5.     حضرتك ذكرت أنكم كنتم بتضربوا نار على أي إسرائيلي يطلع على الضفة الشرقية حتى بدون أوامر .. هل كان ضرب النار في ذلك الوقت يستلزم أخذ أوامر ؟؟ 

  - آه بأوامر .. والنكسة حصلت لأن الجبهة كانت بتاخد أوامرها من مصر ، أنا اللي أدام شايف الموقع .. يعني النهارده أنا قاعد أهو في المكتب .. مين اللي يدير المكتب ؟؟ أنا وإلا اللي قاعد برة في الشارع ؟؟ اللي قاعد في المكتب .. وده اللي إستفدنا بيه بعد النكسة وفي أكتوبر .. قائد الموقع هو اللي بيدير المعركة ، عشان كده ربنا كرمنا . 

6.     هل كان هناك إختلاف في إدارة المعارك بين الجانب المصري والإسرائيلي في فترة من الفترات مثل حرب الإستنزاف مثلا ً ؟ بمعنى هل كانت إدارة المعارك في الجانب المصري مركزية تحتاج إلى إستئذان معين في العمليات بينما كانت إدارتهم للعمليات بها بعض من الحرية ؟ وهل تم تغيير إسلوبنا في حرب أكتوبر في الإدارة مما كان له الأثر الإيجابي في إحراز النصر ؟ 

 

  - آه .. وإحنا إستفدنا منهم بصراحة .. يعني في حرب الإستنزاف لما كان يحصل إشتباك ويحصل عندهم خساير .. في ثانية ألاقي قائد الموقع إستدعى الطيارة الهليكوبتر ، وعمل وسوى في ثواني .. زي ما حصل مع دان أفيدان وغيره وغيره .. إنما إحنا كان لازم تضرب تليفون تستأذن من قائد الكتيبة ، وقائد الكتيبة يستأذن من قائد اللواء فقائد الفرقة فقائد الجيش .. مشكلة .. مشكلة .. والإتصالات كانت صعبة .. إنما بعد أكتوبر بقى قائد الموقع هو اللي شايف البانوراما أدامه وهو اللي بيدير المعركة  ، وإحنا في قبل الحرب .. قبل الحرب .. كنا كل قائد فصيلة رسم حاجة إسمها ديسكارد المرمى .. اللي هو الموقع بتاعه .. كام عسكري .. ومنين لفين .. وجمعوهم بقت سرية .. بقت كتيبة .. القرار الكبير أخدوها من عندنا .. عشان كده ربنا كرمنا .

 

 

20090613215030_0003  

 

7.     عندما تم أسر الأسير دان أفيدان شمعون في 29/12/69 وطلب يشرب .. هل طلب ذلك باللغة العربية ؟ 

  - هم بيجيدوا اللغة العربية ، ودي ميزة فيهم مش موجودة عندنا الحقيقة .. بيجيدوا اللغة العربية .. حتى البطايق بتاعتهم عربي وعبري .. بيجيدوا اللغة العربية أوي أوي أوي يعني .

8.     يعني إنا محدش فينا كان بيتكلم عبري ؟ 

  - لأ فيه .. فيه .. كنا بندرس عبري في الكلية ، بس مش بطلاقة العربي عندهم . 

9.     وجودك مع هذا الأسير كان أول لقاء وإلتحام حقيقي مع العدو ؟ بمعنى أنه لم يسبق لحضرتك التقابل وجها لوجه مع أحد من جنودهم قبل هذا اللقاء ؟ 

 

  - آه .. هشوفه فين ؟؟ ده حتى بعد العمليات ولما جه عساف ، وبعدها بعشرين سنة جابوه في جامعة القاهرة ، كان جاي كخبير زراعي ، والدكتور فاروق إسماعيل كان رئيس الجامعة .. وكان نفسه أحضر المقابلة دي ، حتى رحت بعد الميعاد ، فقال كان نفسي تكون موجود ده حتى عساف ياجوري خبير زراعي وجاي وكلام من ده ، قلت له كويس إني مجتش .. جيلنا مايحبهمش .. إحنا جيلنا مايحبهمش .. كنت خنقتهولك في المكتب وكنت عملت لك مشكلة . هو السلام حلو .. السلام حلو ..  إنما إحنا جيلنا ميحبهمش

 

 

 

 

10.  ماذا عن شعورك وقتها في هذا اللقاء ؟ هل كانت هناك رهبة معينة منهم ؟ وهل زالت بعد هذا اللقاء ؟  

  - محناش مصدقين إن معانا واحد إسرائيلي في إيدينا أهو .. بس هو مصاب .. يعني مش مصدقين !! أولا فرحانين إن فيه واحد معانا أهو .. خلاص في إيدينا أهو .. وممكن نموته .. وخلاص أنا خدته تحت الملجأ ونزلت بيه تحت لغاية ما الدكتور جه خده ، قعد معايا يجي 3 ساعات تحت ، في الأول كان فيه رهبه معينة ، وبعدين هم هجموا على الضفة الشرقية وضربوا كتير بالدبابات .. والطيران طلع .. وضربوا جامد .. إنما الحمد لله محصلش خساير .. هو حتى أنا يومها شهدته قلت له مين بيكدب بقى ؟؟ مصر والا إسرائيل ؟؟ أحكم !!

11. في أثناء أسرك لمجموعة عساف ياجوري في حرب أكتوبر .. هل كان شعورك هو نفس الشعور أيام أسرك للأسير دان أفيدان شمعون في حرب الإستنزاف ؟ 

  - لأ .. طبعا .. أسرى أكتوبر دول بقى .. نشوة الفرح .. يعني لما كنت أعدي القناة .. اصعب مانع مائي في العالم .. وبعدين هي مجهزاله في الشرق إنه متعديش ، وبعدين الخبراء الروس قالوا عشان تعدي عايز قنابل ذرية .. وبعدين تعدي وتضربهم وتجيب منهم .. دي جسارة ما بعدها جسارة مصرية ..

12. حضرتك عندما قمت بأسرهم قلت أنك وضعتهم فوق المركبة البر مائية .. هل كنت معهم وحدك ؟ 

  - لأ .. المركبة فيها 10 جنود وفاروق واقف فوق المركبة وأنا قاعد معاهم على ضهر المركبة . 

13. ما كنتش خايف يقفزوا ويفروا ؟؟ 

  - هيرواحوا فين ؟؟ ده فيه واحد منهم ملتحي وبنظارة .. حب يتلائم مني وأنا بحطهم فوق المركبة .. طيرت النظارة بس من عينه كده !! سحبته .. لا لا لا .. هيروحوا فين ؟؟ ما ممكن واحد من الجنود يضربهم ويخلص عليهم  

14. وطبعا كان في إستسلامهم لكم كان واثق أنه لن يحدث له مكروه  

 

  - طبعا هو شايف اللي ضرب .. إتقتل .. اللي ماضربش وماقاومش خدناه أسير ورجع بلده .. لا المصريين منضبطين في حكاية الأسر .. تعاليم الأديان ، الأوامر اللي خدناها من القادة ، إتفاقية جنيف تعامل الأسرى إزاي .. لا إحنا غيرهم خالص ولم يحدث قتل فردي أو جماعي من جانبنا .. طالما سلم نفسه .. رجع بلده .. إنما اللي قاوم وضرب علينا نار وعورنا .. إتقتل  

 

 

 20090613215030_0006

 

15. في المنتديات وبعض المواقع على النت .. هناك زعم بأن المخابرات المصرية قد نجحت في تجنيد عساف ياجوري في صالحها أثناء أسره ، وقد دعم هذا القول شهادة زملاؤه عليه بأنه لم يكن معهم في معسكرات الأسر في القاهرة مما زاد من الشكوك حوله !! ما رايكم في هذا الكلام وهل تم تجنيد عساف ياجوري فعلا لحساب مصر ؟؟ 

  - تبقى دي شطارة من المخابرات .. ولا يوجد عندي معلومة مؤكده عن هذا الكلام .. بس أنا أعرف أنه كان له مشاريع في مصر وفشل .. لأن برضه المصريين مش متقبلين أي حاجه لهم .. مزارع دينا .. كان شريك فيها .. وفشل ومشى .. 

16. هل لديكم اي معلومات إن كان حي يرزق أم توفى ؟؟ 

  - أنا سمعت أنه مات .. أنا مش حاطه في دماغي . 

17. بخصوص مذكراته .. هل سعيت لشرائها .. أو هو أرسلها لك .. أو أين قرأتها ؟؟ 

  - أنا قرأتها في مجلة لبنانية .. هو كان نفسه يشوفني لما نزل مصر .. بس طبعا الجيش حفاظا علي أنا رفض  

18. هل تفكر في كتابة مذكراتك حتى ولو في كتاب صغير يؤرخ هذا الجزء الهام من حرب أكتوبر ؟ 

 

  - فيه صحفيين كتبوا .. ومش بفكر في موضوع الكتاب .

 

 

20090613215030_0005

 

وفي نهاية اللقاء يشكر موقع تاريخ بورسعيد سيادة العميد يسري عمارة على هذا اللقاء وعلى وقته الثمين الذي منحنا إياه ليكتمل هذا اللقاء بهذه الصورة المشرفة ، وموقع تاريخ بورسعيد يتمنى لسيادته موفور الصحة . 

تقييمك هو : None قيم الموضوع من هنا : 4 (3 votes)

AddThis